"Vajas" Luđiin Bergenii
"Vajas" joavku ja beakkán jurista juoigi Ánde Somby galgá guovvamánus by:Larm deaivvadeapmái Bergenii.
- Leat náitán golbma musihka vuogi oktii muitala Somby.
- Mii leat geahčalan gávdnat ođđa vuogi iežamet musihkii. Nils Johansen guhte čuojaha Bel Cantos lea leamašan Norggas pioneran elektronánalaš musihkas 80-logu álggus juo. Sus lea čiekŋalis áddejupmi dán musihkka vuohkái.
- Kristin Mellem klasihkkálaš álbmotmusihkkár ja mun lean juoigi. Dán golbma vuogi leat náitan oktii ja dat orru doaibmamin bures. Olbmot goittot ledje duhttavaččat go gulle min Nana festiválas Romssas.
Stuorámus dáhpáhus
Somby muitala by:Larm deaivvadeapmi Bergenis lea Norgga stuorámus dán riika musihkáriida j ártisttaide.
-Danin lei hui somá go min joavkku leat bovden dán deaivvadeapmái. Dát čájeha ahte luođi ja min musihka leat dohkkehan, lohká Somby.
Riegán USA:s
Luođit maid Somby áigu juoigat Bergenis leat riegádan mannan dálvvi Pima Canyon báikkis Arizonas, USA:s. Earet ear&225; besset by:Larmmas vásihit "Romssa čáppa luođi, "Pubgarjja", "Biegga cizáš" ja "Rievváriid oaivámuš". Somby muitala ahte joavkkus leat guokte diibmobeallásaš konsearttaBergenis. - Nu ahte mis lea buorre áigi oahppásmuvvat eará joavkkuide ja artistaide, lohká Somby.
Jussa addá inspirašuvnna
Somby mieđha ahte su artista eallimii manná veaháš áigi
- Muhto mus leat mánát sturron dál, ja mun han lean agi beaivve juoigan.
- Jáhkkán ahte jussa addá buori govaid ja áddejumi juoigamii ja juoigan fas addá buori inspirašuvnna leat juristan, lohká vuosttaš amanueansa juridihkas Romssa universitehtas Ánde Somby.
